Kungiyar Mercy Corps ta horar da mata daga kananan hukumomin da ke fama da rikici a Katsina kan dabarun sulhu da zaman lafiya

Mahalarta yayin bude taron horo na kwanaki hudu kan Interest-Based Negotiation (IBN) da Community and Social Development Resources Management (CSDRM) da Mercy Corps ta shirya tare da IOM da CDD, karkashin shirin Tarayyar Turai (EU) CPCRR a Katsina. Horon ya tattaro mata daga Sabuwa, Faskari, Dandume, Safana, Batsari da Jibia domin karfafa zaman lafiya da juriya a cikin al’umma.

Rahoto daga Kabir Abasaya

Katsina, Najeriya – 3 ga Nuwamba, 2025

Kungiyar agaji ta ƙasa da ƙasa Mercy Corps, tare da haɗin gwiwar International Organization for Migration (IOM) da Centre for Democracy and Development (CDD), ta fara horar da mata daga wasu kananan hukumomin da ke fama da matsalar tsaro a Jihar Katsina.

Horarwar, mai taken “Interest-Based Negotiation (IBN) and Community and Social Development Resources Management (CSDRM) for Women,” ta fara ne a ranar Litinin, 3 ga Nuwamba, 2025, a Katsina Guest Inn. Ana gudanar da ita ne ƙarƙashin shirin Tarayyar Turai (EU) mai suna Conflict Prevention, Crisis Response and Resilience (CPCRR), wanda yake nufin ƙarfafa zaman lafiya, juriya da kwanciyar hankali a al’ummomin da rikice-rikice suka shafa a jihohin Katsina da Zamfara.

Mahalarta yayin bude taron horo na kwanaki hudu kan Interest-Based Negotiation (IBN) da Community and Social Development Resources Management (CSDRM) da Mercy Corps ta shirya tare da IOM da CDD, karkashin shirin Tarayyar Turai (EU) CPCRR a Katsina. Horon ya tattaro mata daga Sabuwa, Faskari, Dandume, Safana, Batsari da Jibia domin karfafa zaman lafiya da juriya a cikin al’umma. 

An zaɓi mahalarta daga Sabuwa, Faskari, Dandume, Safana, Batsari da Jibia — yankuna da suka dade suna fuskantar matsalolin tsaro, harin ‘yan bindiga da ƙaura.

A yayin buɗe taron, Shugaban ƙungiyar aikin (Project Team Leader), Mista Philip Ikita, ya gabatar da taƙaitaccen bayani kan shirin CPCRR, inda ya bayyana cewa shirin ya samo asali ne daga aikin Conflict Mitigation and Community Reconciliation (CMCR) na baya, wanda ke nufin magance tushen rikice-rikice da ƙarfafa tsarin shugabanci a ƙananan hukumomi. Ya ce horon zai bai wa mata ƙwarewar da za su taimaka wajen gina zaman lafiya da ci gaban al’ummominsu.

A nata jawabin, Babbar Jami’ar Shirye-shiryen Aiki kuma mai tsara horon, Ms. Linda Nkechi Emmanuel, ta bayyana cewa zaman farko ya ƙunshi maraba da mahalarta, shimfiɗa ƙa’idojin gudanar da taron, da yin gwajin sanin farko domin tantance irin ilimin da mahalarta ke da shi. Ta ce wannan mataki ne na fara gina fahimtar juna da haɗin kai tsakanin mahalarta kafin zurfafa cikin darussan horon.

Bayan haka, an gabatar da darasin farko kan ma’anar tattaunawa da tarihin ta, inda masu koyarwa suka bayyana muhimmancin tattaunawa da sulhu wajen warware rikice-rikice ta hanyar zaman lafiya. An kuma yi bayani kan yadda Mercy Corps ke amfani da tattaunawa da sasanci a matsayin ginshiƙai na gina zaman lafiya a cikin al’umma.

Daga nan aka gudanar da wasannin kwaikwayo (simulation) domin ba mahalarta damar shiga cikin yanayin tattaunawa na zahiri. Wannan ya taimaka musu wajen gano manufofin tattaunawa, fahimtar rawar kowane bangare, da kuma koyo ta hanyar misalai na rayuwa. Mata mahalarta sun nuna yadda tausayi, haƙuri da sauraron juna ke taimakawa wajen cimma matsaya cikin lumana.

A nasa bangaren, Mai Ba da Shawara kan Kula da Albarkatun Ƙasa (NRM Adviser), Mista Paul Maghul, ya jaddada muhimmancin yin yarjejeniyar zaman lafiya a tsakanin al’umma. Ya ce, “Zaman lafiya na gaskiya yana samuwa ne idan al’umma suka zabi tattaunawa maimakon rikici,” yana mai kira ga mahalarta da su yada sakon sulhu a ƙauyukansu inda sukan taka muhimmiyar rawa wajen sasanta rikice-rikicen cikin gida da na unguwa.

A ci gaba da taron, masu koyarwa sun gabatar da manyan tsarukan tattaunawa (negotiation models), inda suka yi bayani kan kurakurai da tunani marasa kyau da ke hana samun nasara a tattaunawa. Ta hanyar misalai da tattaunawar rukuni, mahalarta sun koyi yadda ake aiwatar da tattaunawa mai fa’ida ga ɓangarori biyu.

Daga bisani, an gabatar da tsarin IBN (Interest-Based Negotiation), wanda ke bayyana matakai daban-daban na tattaunawa tare da nuna yadda samar da moriyar juna ke ƙarfafa sakamakon yarjejeniya. An tattauna yadda ka’idodin IBN za su iya amfani wajen warware rikicin albarkatun ƙasa kamar gonaki, ruwa da muhimman abubuwan amfani a al’umma.

A ƙarshen zaman na farko, an gudanar da tattaunawar nazari, inda mahalarta suka yi nazari kan abin da suka koya, suka bayar da ra’ayoyi da shawarwari don tsara ayyukan gobe. Hutun salla da na shan ruwa da abinci sun ba da dama ga mahalarta su yi musayar ra’ayi da ƙara kusantar juna.

Wakilin Fasaha Stream, Kabir Abasaya, wanda yake bayar da rahoto daga wurin taron, ya lura cewa dukkan tattaunawa ta mayar da hankali ne kan muhimmancin zaman lafiya da sulhu tsakanin al’umma, musamman a yankunan da rikice-rikice suka shafa.

“Dukkan mahalarta mata ne daga kananan hukumomin da ke fama da matsalar tsaro — Sabuwa, Faskari, Dandume, Safana, Batsari da Jibia — kuma an mayar da hankali ne kan muhimmancin tattaunawa da fahimtar juna a tsakanin al’umma da ke fama da hare-haren ‘yan ta’adda,” in ji Abasaya.

A ƙarshe, mahalarta sun bayyana farin ciki da yadda horon ya ƙarfafa musu gwiwa wajen shiga tsakani domin kawo zaman lafiya a yankunansu. Mercy Corps da abokan aikinta sun jaddada aniyarsu ta ci gaba da inganta zaman lafiya mai ɗorewa, haɗin kai tsakanin jama’a da gwamnati, da inganta hanyoyin sasanci a matakin tushe.

Taron zai ci gaba a cikin makon, inda za a mayar da hankali kan taswirar albarkatun al’umma, shirye-shiryen ci gaba, da hanyoyin ƙarfafa juriyar al’umma wajen fuskantar ƙalubale.